Ալերգիա. Գեդեոն Ռիխտեր ընկերության սեմինարը

Ամբողջ աշխարհում դիտվում է ալերգիայով և բրոնխիալ ասթմայով հիվանդացության աճ: Վերահսկման բացակայության դեպքում այս հիվանդությունները կարողեն բերել բարդությունների:

Հենց այս հրատապ թեմայի մասին էր Գեդեոն Ռիխտեր դեղագործական ընկերության կազմակերպած սեմինարը: «Հակաալերգիկ, հակաասթմատիկ դեղամիջոցներ» թեմայով սեմինարը սկսվեց մուլտֆիլմով: Մուլտֆիլմի օրինակով կարելի էր հասկանալ ալերգիայի խնդրի լրջության աստիճանը:

Սեմինարի թեմայի մասին զրուցեցինք Գեդեոն Ռիխտեր դեղագործական ընկերության մենեջեր Սուսաննա Հովհաննիսյանի հետ:

–   Սուսաննա, ինչքանո՞վ է հրատապ ալերգիկ հիվանդությունների թեման: Կա՞ն վիճակագրական տվյալներ:

–   Թեման, իրավամբ, շատ հրատապ է, քանի որ վերջին 20 տարիների ընթացքում կտրուկ աճել է ալերգիկ ռեակցիաների թիվը: Պաշտոնական տվյալներով` Ռուսաստանում բնակչության 30%- ի մոտ ալերգիկ ռեակցիաներ են դրսևորվում: Ոչ պաշտոնական տվյալներով այդ թիվը հասնում է 50%-ի: Շատ հաճախ վիճակագրական տվյալները վիճելի են, քանի որ մի շարք հիվանդություններ, թյուրիմացաբար, ախտորոշվում են որպես ալերգիա: Եվ հակառակը, ալերգիայի դիմակի տակ կարող են թաքնվել այլ հիվանդություններ: Մեզ մոտ վիճակը գրեթե նույնն է, ինչ Ռուսաստանում:

–   Ի՞նչն է նման կտրուկ աճի պատճառը:

–   Պատճառը, կարելի է ասել, ժամանակակից քաղաքակրթությունն է: Մեծ նշանակություն ունեն արտաքին գործոնները` էկոլոգիական վիճակի վատթարացում, քիմիական նյութերի կիրառում, կոսմետիկա, արհեստական հիմքից պատրաստված հագուստ, սննդային հավելումներ և այլն: Իհարկե, պատճառը միայն վերը նշվածները չեն, գոյություն ունի ժառանգականության սկզբունքով արտահայտվող ալերգիա: Ժառանգական նախատրամադրվածության դեպքում ալերգիայի առաջացման և զարգացման ազդակ ալերգենների թիվը՝ ըստ վիճակագրական հաշվառման, հասնում է 20.000-ի:

–   Վիճակագրական տվյալները վիճելի են այն առումով, որ գերագնահատված են ախտորոշումները, ինչպիսի՞ն է ձեր մոտեցումը:

–   Այստեղ խնդիրն այն է, որ ալերգիկ ախտանիշների ետևում կարող են կանգնած լինել այլ հիվանդություններ, օրինակ, էնդոկրին համակարգի, աղեստամոքսային տրակտի խանգարումներ և այլն, որոնք կարող են կազմել ալերգիայի ախտորոշման մոտավորապես 50-60%-ը: Այս պարագայում շատ կարևորվում է ճիշտ ախտորոշումը: Պետք է պարզել` դա իսկապե՞ս ալերգիայի դրսևորում է, թե՞ որևէ այլ հիվանդության զարգացում: Յուրաքանչյուր պարագայում անհրաժեշտ է լաբորատոր հետազոտություն անցնել:

–   Ի՞նչ է ալերգիան. համախտանի՞շ, հիվանդությո՞ւն, թե՞ կենսաձև:

–   Ալերգիան հիվանդություն է, և միևնույն ժամանակ՝ կենսաձև: Հաջողություն կարելի է համարել ալերգիայով տառապող պացիենտի համար, եթե բացահայտվում է ալերգենը, այսինքն պարզ է դառնում, թե ինչից է իր ալերգիան: Այս պարագայում կենսաձևի համապատասխան կազմակերպումը կօգնի նրան խուսափել ալերգիայից: Եթե ալերգենը պարզ չէ, ստիպված են լինում պարբերաբար բուժում ստանալ: Մենք ներկայացնում ենք Գեդեոն Ռիխտերի արտադրության հակաալերգիկ դեղամիջոց Լորդեստինը, որը արագ և արդյունավետ պայքարում է ալերգիկ ռեակցիաների դեմ:

Գեդեոն Ռիխտեր ընկերության մենեջեր Լուսինե Բլուրցյանի հետ զրուցեցինք բրոնխիալ ասթմայի, նրա ախտաբանության զարգացման գործընթացում ալերգիայի դերի, նաև բուժման կազմակերպման մասին:

–   Լուսինե, ի՞նչ ընդհանրություններ ունեն ալերգիան և բրոնխիալ ասթման: Ինչպե՞ս խուսափել բրոնխիալ ասթմայից, շնչահեղձության նոպաներից:

–   Բրոնխիալ ասթմայի և ալերգիայի միջև կա անմիջական կապ՝ ալերգիան հաճախ է դառնում նպաստող գործոն բրոնխիալ ասթմայի զարգացման գոծընթացում: Ամբողջ աշխարհում կան վիճակագրական տվյալներ, ըստ որոնց` ասթմայով հիվանդների մոտ 80%-ը տառապում է ալերգիկ ռինիտով, իսկ ալերգիկ ռինիտով ամբողջ հիվանդների քանակի 40%-ը որպես ալերգիայի բարդություն ի հայտ է գալիս բրոնխիալ ասթման:

Եթե ասթմայով տառապող հիվանդի մոտ դեռևս չեն հայտնաբերել նոպան հարուցող ալերգենները, ապա նա պետք է մշտապես հետևողական լինի, որպեսզի խուսափի հնարավոր ասթմատիկ նոպաներից, կարելի է ասել՝ ամեն քայլափոխի: Նոպան հիվանդության սուր դրսևորումն է, որն անհրաճեշտ է շատ արագ հաղթահարել:

Գոյություն ունեն նոպան շուտափույթ հաղթահարելու մի շարք դեղամիջոցներ, որոնք նպատակաուղղված են կամ նոպայից հանելու, կամ բարդություններից խուսափելու համար: Բացի դրանից, կան մի խումբ դեղամիջոցներ երկարատև բուժման համար, որոնց մշտական օգտագործումը բերում է նոպայի կանխմանը և հիվանդի կյանքի որակի բարելավմանը: Հավատացեք, եթե ադեքվատ, ճիշտ բուժում նշանակվի, ապա հնարավոր է հասնել շնչահեղձության նոպաների իսպառ վերացմանը: Ասել կուզե՝ կենսաձևի վերակառուցումից զատ, դեղորայքային բուժումն անհրաժեշտություն է:

–   Ո՞րն է ձեր ընկերության ներդրումն այս ասպարեզում: Ի՞նչ դեղամիջոցներ եք ներկայացնում:

–   Այսօր գոյություն ունեն բազմաթիվ դեղամիջոցներ, որոնք օգնում են դուրս գալ շնչահեղձության նոպայից: Մեր օրվա թեման այն դեղամիջոցների մասին է, որոնք նախատեսված են երկարատև բուժման համար: Այդ դեղահաբերի միջոցով, ինչպես օրինակ «Սինգլոն»-ի, մենք կարողանում ենք նվազեցնել նոպաների հաճախականությունը, բարձրացնել հիվանդի կյանքի որակը:

Հարցեր, պատասխաններ, մեկնաբանություններ